Türkmenistanda her ýylyň Garaşsyzlyk baýramynyň öňüsyrasynda geçirilýän Halk Maslahatynyň mejlisi döwlet dolandyryş ulgamynyň möhüm syýasy wakalarynyň biri hasaplanýar. Bu çäre milli ösüşiň ileri tutulýan ugurlaryny kesgitlemek, geçen döwrüň netijelerini seljermek hem-de ýurduň geljekki meýilnamalaryny ara alyp maslahatlaşmak üçin giň mümkinçilik döredýär. Şol bir wagtyň özünde, ol jemgyýet bilen döwlet edaralarynyň arasyndaky hyzmatdaşlygyň yzygiderli ösdürilýändigini görkezýär.

Türkmen medeniýetinde maslahatlaşmak ýörelgesi taryhy däplere daýanýar. «Maslahatly biçilen don gysga bolmaz» diýen halk pähimi häzirki zaman döwlet dolandyryşynda hem öz ähmiýetini saklap gelýär. Bu ýörelge döwlet syýasatynyň açyklygy, giň pikir alyşmak we jemgyýetçilik gatnaşygyny güýçlendirmek bilen utgaşdyrylýar.

Halk Maslahaty ýurduň syýasy, durmuş-ykdysady we medeni ösüşiniň möhüm meseleleriniň ara alnyp maslahatlaşylýan ýokary derejeli meýdançasy bolup hyzmat edýär. Onuň dowamynda kanunçylygy kämilleşdirmek, raýatlaryň hukuklaryny goramak, durmuş özgertmeleriniň netijeliligini ýokarlandyrmak hem-de geljekki ösüş ugurlaryny kesgitlemek bilen baglanyşykly meselelere garalýar.

Döwlet dolandyryşynyň bu görnüşi Halk Maslahatynyň, Mejlisiň, Hökümetiň we ýerli öz-özüňi dolandyryş edaralarynyň özara utgaşykly işini öz içine alýar. Şeýle hyzmatdaşlyk jemgyýetden gelip gowuşýan teklipleriň seljerilmegine, olaryň döwlet maksatnamalarynda we kabul edilýän çözgütlerde nazara alynmagyna mümkinçilik berýär. Şeýle çemeleşme halk bilen häkimiýetiň arasyndaky ynamy pugtalandyrýan möhüm şertleriň biri hökmünde çykyş edýär.

Soňky ýyllarda Türkmenistanyň Halk Maslahatynyň işi uzak möhletli ösüş maksatlaryny kesgitlemäge aýratyn üns berýär. 15-nji iýulda geçirilen Halk Maslahatynyň Prezidiumynyň mejlisinde ýurduň geljekki ösüşiniň esasy ugurlary ara alnyp maslahatlaşyldy. Strategik çemeleşmede ykdysadyýetiň bäsdeşlige ukyplylygyny ýokarlandyrmak, tehnologik özgertmeleri çaltlandyrmak, milli bähbitleri goramak we ilatyň ýaşaýyş derejesini yzygiderli gowulandyrmak ýaly wezipeler ileri sürüldi.

Ýurduň ykdysady kuwwatyny pugtalandyrmak, innowasion tehnologiýalary önümçilige ornaşdyrmak we adam maýasyny ösdürmek häzirki döwürde döwlet syýasatynyň möhüm ugurlarynyň biri bolup durýar. Şeýle başlangyçlar Türkmenistanyň halkara hyzmatdaşlykdaky ornuny pugtalandyrmaga we durnukly ösüş mümkinçiliklerini giňeltmäge gönükdirilýär.

Halk Maslahatynyň işiniň netijeliligi onuň diňe merkezi derejede geçirilmegi bilen çäklenmeýär. Guramaçylyk işi welaýat, etrap we şäher halk maslahatlary, şeýle hem ýerli häkimiýet edaralary bilen özara utgaşykly alnyp barylýar. Şeýle gurluş ýerlerde ýüze çykýan meseleleriň we teklipleriň milli derejedäki çözgütlere çenli ýetirilmegini üpjün edýär.

Bu dolandyryş ulgamy raýatlaryň, jemgyýetçilik guramalarynyň we ýerli düzümleriň teklipleriniň öwrenilmegi kabul edilýän çözgütleriň durmuş bilen arabaglanyşygyny has-da güýçlendirýär.

Halk Maslahatynyň Diwany we onuň guramaçylyk toparlary forumyň ýokary derejede geçirilmegini üpjün etmek bilen bir hatarda, döwlet edaralarynyň özara sazlaşykly işini utgaşdyrýarlar. Şeýle çemeleşme kabul edilýän çözgütleriň ýerine ýetirilişiniň netijeliligini ýokarlandyrmaga hem hyzmat edýär.

Jemgyýetçilik bilen geçirilýän düşündiriş işleri hem bu ulgamyň möhüm bölegi bolup durýar. Ilaty döwlet syýasatynyň esasy ugurlary, täze maksatnamalar we durmuşa geçirilýän özgertmeler barada habarly etmek raýatlaryň döwlet dolandyryşyna gatnaşygyny işjeňleşdirýän möhüm şertleriň biri hasaplanýar.

Türkmenistanyň demokratik ösüş ýolunda raýatlaryň pikirlerine we jemgyýetçilik başlangyçlaryna aýratyn ähmiýet berilýär. Halk Maslahatynyň işiniň dowamynda jemgyýetçilik guramalaryndan, dürli pudaklaryň wekillerinden we raýatlardan gelip gowuşýan teklipleriň öwrenilmegi hem-de olaryň degişli resminamalarda öz beýanyny tapmagy döwlet bilen jemgyýetiň arasyndaky hyzmatdaşlygy pugtalandyrýar.

Ýurduň dürli pudaklarynda zähmet çekýän hünärmenleriň döwlet sylaglaryna mynasyp bolmagy hem jemgyýetiň ösüşini höweslendirýän möhüm ugurlaryň biri bolup durýar. Senagat, oba hojalygy, bilim, ylym, saglygy goraýyş, medeniýet we köpçülikleýin habar beriş serişdeleri ýaly ugurlarda gazanylýan üstünlikleriň döwlet derejesinde ykrar edilmegi ýaş nesli zähmet çekmäge höweslendirýär.

Türkmenistanyň Halk Maslahaty hakynda Konstitusion kanunyň kadalaryna laýyklykda, Halk Maslahatynyň Diwany tarapyndan alnyp barylýan guramaçylyk işleri mejlisleriň ýokary derejede taýýarlanylmagyna gönükdirilýär. Bu ugurda kesgitlenen wezipeler forumyň diňe bir möhüm syýasy çäre bolman, eýsem, döwlet dolandyryşynyň netijeliligini ýokarlandyrýan strategik gurala öwrülendigini görkezýär.

Şu ýyl Halk Maslahatynyň nobatdaky mejlisi Garaşsyz Türkmenistanyň 35 ýyllyk baýramçylygynyň öňüsyrasynda geçiriler. Oňa taýýarlyk işleri döwlet edaralarynyň, ýerli dolandyryş düzümleriniň we jemgyýetçilik guramalarynyň özara utgaşykly hyzmatdaşlygy esasynda alnyp barylýar. Bu maslahatyň milli ösüşiň täze tapgyrlaryny kesgitlemäge, döwlet dolandyryşyny has-da kämilleşdirmäge we jemgyýetçilik jebisligini pugtalandyrmaga goşant goşmagyna garaşylýar.