Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow 5-nji awgustda ýurdumyz üçin taryhy ähmiýetli foruma gatnaşmak üçin Türkmenistana gelen Russiýa Federasiýasynyň Tatarstan Respublikasynyň Prezidenti Rustam Minnihanow bilen duşuşdy.

Belent mertebeli myhman Türkmen topragynda görkezilen myhmansöýerlik we meýilleşdirilen halkara çäreleriniň ýokary derejesi üçin Gahryman Arkadagymyza we Arkadagly Gahryman Serdarymyza çuňňur minnetdarlygyny bildirdi we Gahryman Arkadagymyz bilen duşuşyp, ikitaraplaýyn hyzmatdaşlygyň möhüm ugurlaryny ara alyp maslahatlaşmagyň özi üçin uly hormatdygyny aýtdy.

Gahryman Arkadagymyz Russiýa Federasiýasynyň Türkmenistanyň strategiki hyzmatdaşlaryndan biridigini nygtamak bilen, özara bähbitli gatnaşyklaryň tutuş Russiýa we aýry-aýry sebitler bilen ösýändigini aýtdy. Şol bir wagtyň özünde, Tatarstan Respublikasy bilen gatnaşyklar hil taýdan täze ösüş derejesine ýetdi.

Rustam Minnihanow "Awaza" milli syýahatçylyk zolagynyň gurluşyna we bu ýerde halkara çäreleri geçirmek üçin döredilen şertlere ýokary baha berdi. Şeýle hem, BMG-niň Deňze çykalgasy bolmadyk ösüp barýan döwletler boýunça üçünji maslahaty ilkinji gezek Türkmenistanda geçirilýändigini aýtdy we maslahatyň çäklerinde meýilleşdirilen çäreleriň guramaçylykly derejesini ýene bir gezek belläp geçdi.

Gahryman Arkadagymyzyň belleýşi ýaly, Tatarstan Respublikasy bilen ýangyç-energetika, söwda-ykdysady, oba hojalygy we medeni-ynsanperwer ugurlarda hyzmatdaşlyk ýola goýuldy. Ikitaraplaýyn gatnaşyklaryň ösüş depgini häzirki döwrüň talaplaryna doly laýyk gelýär.

Netijeli geçen ýygnakda geljekde birek-birege hormat goýmaga we ynanyşmaga esaslanýan ikitaraplaýyn gatnaşyklaryň mundan beýläk hem giňeltmek üçin ägirt uly mümkinçilikleriň bardygy bellenildi.

Gahryman Arkadagymyz we Rustam Minnihanow ýola goýlan gatnaşyklaryň iki ýurduň bähbitlerine mundan beýläk hem ösjekdigine ynanç bildirdiler.

Çeşme: Türkmenistanyň Döwlet habar agentligi